War Crisis: પશ્ચિમ એશિયામાં ઈરાન, ઈઝરાયલ અને અમેરિકા વચ્ચે શરૂ થયેલા ભીષણ યુદ્ધની સીધી અસર હવે પવિત્ર ઉમરાહની યાત્રાએ ગયેલા ગુજરાતીઓ પર જોવા મળી રહી છે. ઈરાન અને દુબઈના એરસ્પેસ બંધ થવાને કારણે ભારતની 400થી વધુ ફ્લાઈટ્સ રદ થઈ છે, જેના પરિણામે ગુજરાતના અંદાજે 700થી 800 યાત્રાળુઓ હાલ મક્કામાં ફસાયા છે.
War Crisis: હોટલમાં કેદ યાત્રાળુઓ: દવા અને સામાનની અછત
વડોદરાના જાણીતા વેપારી ફારૂકભાઈ સોની, જેઓ હાલ ઉમરાહ માટે મક્કામાં છે, તેમણે ત્યાંની ગંભીર સ્થિતિ વિશે વીડિયો સંદેશ પાઠવ્યો છે. તેમણે જણાવ્યું કે, “અમે અત્યારે હોટલમાં બંધ જેવી સ્થિતિમાં છીએ. જે નવા યાત્રાળુઓ આવવાના હતા, તેમની પાસે અમારી જરૂરી દવાઓ અને સામાન હતો, પરંતુ ફ્લાઈટ્સ રદ થવાને કારણે તેઓ પહોંચી શક્યા નથી. મક્કા-મદીનામાં અત્યારે દરેક ભારતીય બસ એક જ દુઆ કરી રહ્યો છે કે આ યુદ્ધ જલ્દી શાંત થાય.”
War Crisis: બહેરીન અને અખાતી દેશોમાં મિસાઈલ હુમલાથી ફફડાટ
28 ફેબ્રુઆરીના રોજ ઈઝરાયલે ઈરાન પર કરેલા હુમલાના જવાબમાં ઈરાને કતાર, બહેરીન અને કુવૈત જેવા દેશો પર અંદાજે 400 મિસાઈલો છોડી છે. બહેરીનની રાજધાની મનામામાં થયેલા શ્રેણીબદ્ધ બ્લાસ્ટને કારણે ત્યાં વસતા ગુજરાતી પરિવારોમાં ભારે ડરનો માહોલ છે. પરિસ્થિતિ એટલી તણાવપૂર્ણ છે કે લોકો ઘરની બહાર નીકળવાનું ટાળી રહ્યા છે.
War Crisis: એવિએશન સેક્ટર ઠપ્પ: 28 માર્ચ સુધી ફ્લાઈટ્સ પર અસર
યુદ્ધને કારણે મિડલ ઈસ્ટનો એવિએશન કોરિડોર સંપૂર્ણપણે ખોરવાયો છે:
- 410 ફ્લાઈટ્સ રદ: ઈરાન અને પશ્ચિમ એશિયાના એરસ્પેસ પર પ્રતિબંધો મુકાતા ફ્લાઈટ્સના શિડ્યુલ ખોરવાયા છે.
- ઇન્ડિગોની જાહેરાત: ઇન્ડિગોએ બાકુ, તાશ્કંદ અને અલ્માટી જેવી ફ્લાઈટ્સ 28 માર્ચ સુધી સસ્પેન્ડ કરી દીધી છે.
- દુબઈ એરપોર્ટ પર અસર: વિશ્વના સૌથી વ્યસ્ત એવા દુબઈ એરપોર્ટના એરસ્પેસ બંધ થવાની અસર ભારતથી યુરોપ અને અમેરિકા જતી ફ્લાઈટ્સ પર પણ પડી રહી છે.
પરિવારજનોમાં ચિંતાનો માહોલ
ગુજરાતના વડોદરા, સુરત અને અમદાવાદ જેવા શહેરોમાંથી ગયેલા યાત્રાળુઓના પરિવારજનો અહીં સતત ચિંતામાં છે. ઈન્ટરનેટ અને સંપર્ક સેવાઓમાં આવતા અવરોધોને કારણે લોકો પોતાના સ્વજનોના ખબર-અંતર મેળવવા માટે વલખાં મારી રહ્યા છે. હાલમાં મક્કા અને મદીનામાં રહેલા ગુજરાતીઓ સુરક્ષિત રહે અને વહેલી તકે વતન પરત ફરે તેવી પ્રાર્થનાઓ થઈ રહી છે.
આ પણ વાંચો :અમેરિકા-ઈઝરાયલના હુમલામાં સુપ્રીમ લીડર આયાતુલ્લા ખામેનીનું મોત; સમગ્ર દેશમાં 40 દિવસનો શોક
