Online Gaming Horror: મધ્યપ્રદેશમાં ઓનલાઈન ગેમિંગની લત એક હસતા-રમતા પરિવારને ગળી ગઈ છે. શહડોલ જિલ્લામાં દેવાના બોજ હેઠળ દબાયેલા એક મોબાઈલ વેપારીએ પોતાની પત્ની અને માસૂમ દીકરીને ઝેર આપી પોતે પણ જીવન ટૂંકાવી લીધું છે. આ કરૂણ ઘટનામાં પિતા અને પુત્રીનું મોત નીપજ્યું છે, જ્યારે પત્ની હોસ્પિટલમાં જિંદગી અને મોત વચ્ચે જંગ લડી રહી છે.
Online Gaming Horror: ઠંડા પીણામાં ઝેર ભેળવી આખા પરિવારને પાયું
ઘટનાની વિગતો મુજબ, શહડોલના જૂની વસાહત વિસ્તારમાં રહેતા 40 વર્ષીય શંકર લાલ ગુપ્તાને “BDG” નામની ઓનલાઈન ગેમ રમવાની લત લાગી હતી. આ ગેમમાં તેઓ અંદાજે 4 લાખ રૂપિયા હારી ગયા હતા. દેવું વધી જતાં શંકર લાલ માનસિક તણાવમાં હતા.
- 24 ફેબ્રુઆરીની રાત્રે શંકર લાલ ઠંડું પીણું (કોલ્ડ ડ્રિન્ક) લાવ્યા અને તેમાં ઝેર ભેળવી પત્ની રાજકુમારી અને 16 વર્ષની પુત્રી સ્વાતિને પીવડાવી દીધું.
- ત્યારબાદ પોતે પણ ઝેર પી લીધું.
- બજારમાં હોવાને કારણે 15 વર્ષનો પુત્ર અનિકેત આ કાળમુખી ઘટનામાંથી બચી ગયો હતો.
Online Gaming Horror: સારવાર દરમિયાન પિતા-પુત્રીના મોત
બૂમાબૂમ સાંભળી પડોશીઓ દોડી આવ્યા હતા અને ત્રણેયને હોસ્પિટલ ખસેડ્યા હતા. જોકે, 25 ફેબ્રુઆરીની સવારે પુત્રી સ્વાતિએ અને સાંજે પિતા શંકર લાલે દમ તોડી દીધો હતો. પત્ની હાલ ICUમાં સારવાર હેઠળ છે. પોલીસ તપાસમાં બહાર આવ્યું છે કે શંકર લાલ ટી-20 વર્લ્ડ કપ દરમિયાન ગેમિંગમાં વધુ સક્રિય થયા હતા.
ભોપાલમાં પણ ગેમિંગે લીધા બે જીવ
ગેમિંગનો આ ખતરનાક ટ્રેન્ડ માત્ર શહડોલ પૂરતો સીમિત નથી, ભોપાલમાં પણ બે અલગ-અલગ ઘટનાઓ બની છે:
- કોન્ટ્રાક્ટરનો આપઘાત: ભોપાલના શિવન ગુપ્તા નામના સિવિલ કોન્ટ્રાક્ટરે ‘એવિએટર’ (Aviator) ગેમમાં 30 લાખ રૂપિયા ગુમાવ્યા બાદ ગળે ફાંસો ખાઈ લીધો.
- 14 વર્ષના વિદ્યાર્થીનું મોત: શ્રીરામ કોલોનીમાં રહેતા અંશ સાહુ નામના વિદ્યાર્થીએ મોબાઈલ ગેમના ટાસ્ક પૂર્ણ કરવાના ચક્કરમાં આત્મહત્યા કરી હોવાની શંકા સેવાઈ રહી છે.
ચેતવણીરૂપ કિસ્સો
આ ઘટનાઓ લાલબત્તી સમાન છે કે ઓનલાઈન ગેમિંગ માત્ર આર્થિક પાયમાલી જ નહીં, પણ જીવલેણ સાબિત થઈ રહી છે. મધ્યપ્રદેશ પોલીસે આ તમામ કિસ્સામાં ગુનો નોંધી વધુ તપાસ હાથ ધરી છે.
