Bangladesh Elections: બાંગ્લાદેશમાં લાંબી પ્રતીક્ષા બાદ સામાન્ય ચૂંટણી માટેનું મતદાન આજે શાંતિપૂર્ણ અને ક્યાંક અશાંતિ વચ્ચે પૂરું થયું છે. ચૂંટણી પંચના જણાવ્યા અનુસાર, દેશભરના 36 હજાર મતદાન મથકો પર અંદાજે 47.91% મતદાન નોંધાયું છે. મતદાન પ્રક્રિયા પૂર્ણ થતાની સાથે જ મતોની ગણતરી શરૂ કરી દેવામાં આવી છે અને આજે રાત્રે 8 વાગ્યાથી પ્રાથમિક વલણો અને પરિણામો આવવાની શક્યતા છે.
Bangladesh Elections: રાજકીય ઘર્ષણમાં લોહી રેડાયું
મતદાન દરમિયાન દેશના અનેક ભાગોમાં હિંસક અથડામણોના અહેવાલો મળ્યા છે.
- ખુલનામાં હત્યા: ખુલના વિસ્તારમાં એક મતદાન મથકની બહાર જમાત-એ-ઇસ્લામી અને બાંગ્લાદેશ નેશનાલિસ્ટ પાર્ટી (BNP) ના કાર્યકરો વચ્ચે ઉગ્ર બોલાચાલી બાદ હિંસા ભભૂકી ઉઠી હતી. આ અથડામણમાં BNP નેતા મોહિબુજ્ઝમાન કોચ્ચીનું મોત નીપજ્યું છે.
- બોમ્બ બ્લાસ્ટ: મુન્શીગંજ-3 અને ગોપાલગંજ સદર વિસ્તારમાં મતદાન મથકોને નિશાન બનાવીને દેશી બોમ્બ ફેંકવામાં આવ્યા હતા. ગોપાલગંજમાં થયેલા વિસ્ફોટમાં 3 લોકો ગંભીર રીતે ઘાયલ થયા હોવાના અહેવાલ છે.
Bangladesh Elections: BNP અને જમાત વચ્ચે કાંટાની ટક્કર
આ ચૂંટણીમાં મુખ્ય જંગ BNP અને જમાત-એ-ઇસ્લામી વચ્ચે હોવાનું મનાઈ રહ્યું છે. મતદાનની ઓછી ટકાવારી પાછળ હિંસાનો ડર અને વિપક્ષો દ્વારા કરવામાં આવેલા બહિષ્કારના આહ્વાનને પણ જવાબદાર માનવામાં આવી રહ્યું છે. વહીવટી તંત્ર દ્વારા મત ગણતરી કેન્દ્રો પર ચુસ્ત સુરક્ષા બંદોબસ્ત ગોઠવી દેવામાં આવ્યો છે જેથી પરિણામો બાદ કોઈ મોટી હિંસા ન ફાટી નીકળે.
હવે સમગ્ર વિશ્વની નજર ઢાકા પર છે કે બાંગ્લાદેશની જનતા કોના હાથમાં સત્તાની કમાન સોંપે છે.
વધુ સમાચાર વાંચવા માટે અંહી ક્લિક કરો
