Panchmahal Accident :પંચમહાલ જિલ્લાના ગોધરા તાલુકામાં શુક્રવારે વહેલી સવારે કાળજું કંપાવી દે તેવી ભયાનક માર્ગ દુર્ઘટના સર્જાઈ હતી. ગોધરાના ડોક્ટરના મુવાડા ગામ નજીક બે ટ્રકો વચ્ચે જોરદાર ટક્કર થતાં એક ટ્રકમાં અચાનક ભીષણ આગ ફાટી નીકળી હતી. આ અકસ્માતમાં ટ્રકની કેબિનમાં ફસાયેલા એક વ્યક્તિનું આગમાં સળગી જતા ઘટનાસ્થળે જ કરુણ મોત નીપજ્યું હતું.
Panchmahal Accident:રોંગ સાઈડથી આવી રહેલી ટ્રક બની અકસ્માતનું કારણ
પ્રાથમિક માહિતી મુજબ, અકસ્માત શુક્રવારની વહેલી સવારે થયો હતો. એક ટ્રક રોંગ સાઈડથી પૂરઝડપે આવી રહી હતી અને સામેથી આવી રહેલી બીજી ટ્રક સાથે સીધી ટક્કર મારી હતી. ટક્કર એટલી ભયાનક હતી કે બંને ટ્રકોના આગળના ભાગો સંપૂર્ણપણે દબાઈ ગયા હતા અને કેબિન કચ્ચરઘાણ વળી ગઈ હતી.
Panchmahal Accident:ટક્કર બાદ ટ્રકમાં ભડકી ભીષણ આગ
અકસ્માત થયાની ગણતરીની મિનિટોમાં જ એક ટ્રકમાં શોર્ટ સર્કિટ અથવા ઘર્ષણના કારણે ભીષણ આગ ફાટી નીકળી હતી. આગ ઝડપથી કેબિનમાં ફેલાઈ જતા અંદર ફસાયેલો એક વ્યક્તિ બહાર નીકળી શક્યો નહોતો. આગની લપેટમાં આવતા તે વ્યક્તિ કેબિનમાં જ જીવતો ભુંજાયો હતો, જેના કારણે ઘટનાસ્થળે જ તેનું કમકમાટીભર્યું મોત થયું હતું.
Panchmahal Accident:ગ્રામજનો દોડી આવ્યા, ફાયર ટીમે સંભાળી પરિસ્થિતિ
અકસ્માત અને આગના ભયાનક દ્રશ્યો જોઈ આસપાસના ગ્રામજનો તાત્કાલિક મદદ માટે દોડી આવ્યા હતા. ઘટનાની જાણ થતા જ ગોધરા ફાયર ફાઈટરોની ટીમ ઘટનાસ્થળે પહોંચી હતી અને ભારે જહેમત બાદ આગ પર કાબૂ મેળવ્યો હતો.
પોલીસ કાર્યવાહી હાથ ધરાઈ
પંચમહાલ પોલીસનો કાફલો પણ તાત્કાલિક સ્થળ પર પહોંચી ગયો હતો. પોલીસે મૃતદેહને બહાર કાઢી પોસ્ટમોર્ટમ અર્થે ખસેડવાની કાર્યવાહી હાથ ધરી છે. સાથે જ અકસ્માતના કારણોની તપાસ શરૂ કરી દેવામાં આવી છે. આ દુર્ઘટનાના કારણે વિસ્તારમાં શોકની લાગણી ફેલાઈ ગઈ છે.
