Kutch news:કચ્છની ધરતી આજે વહેલી સવારે ફરી એકવાર ભૂકંપના આંચકાથી ધ્રુજી ઉઠી હતી. શુક્રવારે પરોઢિયે 4:30 વાગ્યે રાપર પંથકમાં આવેલા 4.6ની તીવ્રતાના ભૂકંપે ગાઢ નિંદ્રામાં સૂતેલા લોકોને જાગૃત કરી દીધા હતા. અચાનક આવેલા આંચકાથી ભયભીત લોકો ઘરની બહાર દોડી આવ્યા હતા અને વિસ્તારમાં અફરાતફરીનો માહોલ સર્જાયો હતો.
Kutch news:રાપર નજીક હતું કેન્દ્રબિંદુ
ઇન્સ્ટિટ્યૂટ ઓફ સિસ્મોલોજીકલ રિસર્ચ (ISR), ગાંધીનગરના જણાવ્યા અનુસાર, ભૂકંપનું કેન્દ્રબિંદુ રાપરથી લગભગ 22 કિલોમીટર દૂર પશ્ચિમ-દક્ષિણ-પશ્ચિમ દિશામાં આવેલા ગેડી ગામ નજીક નોંધાયું હતું. ભૂકંપ જમીનથી માત્ર 9 કિલોમીટરની ઊંડાઈએ આવ્યો હોવાથી તેની અસર રાપર, ભચાઉ, અંજાર સહિત આસપાસના વિસ્તારોમાં વધુ અનુભવાઈ હતી.
આફ્ટરશોકથી લોકોમાં ભય
મુખ્ય આંચકા બાદ પણ ધરા ધ્રુજવાની પ્રક્રિયા ચાલુ રહી હતી. અત્યાર સુધીમાં 8થી વધુ નાના-મોટા આફ્ટરશોક નોંધાયા છે. વહેલી સવારે આવેલા આંચકાઓને કારણે લોકો ઘરની અંદર જવા ડરતા રહ્યા હતા અને લાંબા સમય સુધી ખુલ્લા મેદાનમાં રહેવાનું પસંદ કર્યું હતું.
Kutch news:2001ના વિનાશક ભૂકંપની યાદો તાજી
કચ્છ જિલ્લો સિસ્મિક ઝોન-5માં આવે છે, જેના કારણે અહીં ભૂકંપના આંચકા આવવા સામાન્ય ગણાય છે. તેમ છતાં 4.6ની તીવ્રતાનો આંચકો પ્રમાણમાં શક્તિશાળી હોવાથી સ્થાનિક લોકોમાં 2001ના વિનાશક ભૂકંપની ભયાવહ યાદો ફરી તાજી થઈ ગઈ હતી.
હાલ કોઈ નુકસાનના અહેવાલ નથી
સદનસીબે હાલ સુધી કોઈ જાનહાનિ કે સંપત્તિને નુકસાન થયાના અહેવાલ પ્રાપ્ત થયા નથી. સ્થાનિક વહીવટીતંત્ર અને આપત્તિ વ્યવસ્થાપન ટીમ પરિસ્થિતિ પર સતત નજર રાખી રહી છે અને લોકોને અફવા પર ધ્યાન ન આપવા અપીલ કરવામાં આવી છે.
